Pulis-Negros, nagpositibo sa random drug test– Gen. Sinas

Nahaharap sa dismissal ang isang pulis ng Negros Occidental Provincial Police Office matapos magpositibo sa random drug test.

Ayon kay PNP chief Police General Debold Sinas, kinilala ang pulis na si Patrolman Nicolas Martinez.

Nabatid na Marso 16 hanggang 18 nang sumailalim sa random drug testing si Martinez at 53 personnel sa pangunguna ng Regional Crime Laboratory Office 6.

Lahat ng 53 personnel ay negatibo ang resulta habang ang urine specimen ni Martinez ay mayroong trace ng  Methamphetamine o Shabu.

Sasailalim sa pre-charge investigation at summary dismissal proceedings ang pulis.

Lider ng criminal group, huli sa Camarines Norte

Arestado ng PNP CIDG ang lider ng isang criminal group sa Camarines Norte.

Kinilala ni PNP CIDG director Police Major General Albert Ferro ang suspek na si Ronnie Evangelista, lider ng Vienes Criminal Group na sangkot sa robbery at gun for hire sa Mercedes at kalapit na lugar sa Camarines Norte.

Si Evangelista ay nahaharap sa paglabag sa RA 10591 o Comprehensive Firearms and Ammunition Regulation Act.

Nakuha sa kanya ang cal. 45 pistol, homemade shotgun, magazine at mga bala.

Ayon kay Ferro, sa kabila ng COVID-19 pandemic ay magpapatuloy ang operasyon ng CIDG laban sa mga wanted na indibidwal upang matiyak ang kaligtasan at seguridad ng lahat.